الاختبارات وما ادراك ماهي..

بسم الله

وبه نستعين في جميع حوائجنا

--

طلبت الاستعانه بحبايبي بالانستغرام انهم يعينوني على وضع مواضيع

او خلونا نقول سواليف نسالف فيها وندردش ونتناقش فيها..

 

ف جاني اول موضوعين

 

الفراغ الاعلامي..

الاختبارات..

--

خلونا نبتدي بالاختبارات بما انه هذا موسمها..

ومانقول غير الله يعين الطلاب عالاسئله..

والله يعين المدرسين والمدرسات على الابداعات بالاجوبه

هاللي كل فتره تجينا صور الابداعات بالاجوبه..

--

حبايبي الطلاب والطالبات..كلنا مرينا بمرحلة الدراسه و الاختبارات هذي......وسوينا سوالف فيها..

المهم.. اني حبيت اقول للكل

ان كلنا عشنا هالفتره ولعبنا ((هسترنا)) لما تخرجنا ولله الحمد

لكن شنو الخطا الي وقعنا فيه..وللاسف لازال الطلاب والطالبات يقعون فيه

انهم..مايفصلون حياة الوناسه عن حياة العلم..

أي بمعنى..كلنا نحب نوسع صدورنا حتى المدرس يبي يوسع صدره..

ولكن نحن الطلاب للاسف من كثر مانريد نوسع صدورنا  ونفرح  نخلط الاوراق ببعض

أي..طول اليوم جالسين فاضين او على الجوالات وغيرها من الاجهزه وتاركين عنكم الدراسه

فتنظيم الوقت بهالوقت اصبح مهم جدا جدا جدا

لماذا؟؟لان هالوقت اصبح سريع صح ولا لا..يعني اذا مانظمت وقتك وسويت شغلك ع الوقت الي منظمه راح يومك وانت جالس..

وحرام ان انا وانت نضيع 24 ساعه من حياتنا بدوووون تنظيم بدوووون عمل شيء فيها

لان كلنا بنتحاسب عليها وهذا شيء معروف..

 

نرجع لموضوعنا....

 

انت متى بتحس بقيمة الدراسه الي درستها..بتحس بها اذا تخرجت

وقت ماتحتاج الشهاده حق وظيفه..وكلامي للولد والبنت..

وقتها بتقول ليتني..وليتني..>>والتمني بهالوقت ما ينفع لانه مضى وراح..

فـ نصيحه مني لكم..

افصلو بين حياتكم الشخصيه ووناستكم وبين دراستكم..

لان لكل شيء وقت ويروح..

الكلام يطول..وبما انكم طلاب تحبون الاختصار..

الا اذا تبون اخذ حصه ثانيه ماعندي مانع..

ههههههههه..

ختاما الله يوفقكم ويفرح اهلكم بكم حاملين الشهادات الكبيره..

وتنالون اللي في بالكم ويسعدكم..

تحياتي للجميع..

عذرا اذا كان كلامي غير متناسق لاني كتبته بسرعه عندما طرحت الفكره..

وشكرا.

الفراغ الاعلامي..الجزء الاول..

بسم الله

 

نجي للموضوع الثاني..كما تم اقتراحه علي لوضعه هنا من قبل حبايبي بالانستغرام..

 

الا وهو الفــــراغ الاعـــلامي..

الجزء الاول..

طبعا اللي بكتبه هو كـ راي شخصي.. حول الاعلام اللي جالسين نشوفه..

الموضوع يطول ف ان شاء الله راح اتناوله بشكل نقاط لتنظيم الموضوع لا اكثر..

1-لو قلنا البرامج بشكل عام..مالها طعم..السبب هنا:

أ-البرامج الي تجيك مفيده او تنقل وضع الشارع وهموم الناس يتم تقييدها بانظمه تحد من حريتها..ولو جاء مذيع او مذيعه وتكلمو..ويا حلات البرامج الي تكون بث مباشر..مافيها تقطيع تطلع فضايح..والله..مثال لما تكلم برنامج بقناة السعوديه عن((البطاله)) وهذا وهي بطاله ماغلط على احد او جاب اسماء..تم تهديدهم بالفصل..ياراجل..تكلمو عن بطاله وهذا معروف ماغلط على احد..

ب-نجيكم لمربط الفرس البرامج الي نسميها برامج المسخره صراحه((وعذرا))..اللي ماعندها هدف غيير انها تدخل فلووووس للقناه المستضيفه..وللاسف كثير من يتابعها وكثير من يتواصل معهم سواء بتصويت او متابعه..الخ وفوق هذا ماتحترم الذوق العام تجيب لك اشكال والوان من المسخره وانت وبراحتك تشوف او تغمض عيونك او تغير القناه..

جـ-نقول ان البرامج المفيده قليله واللي تبث مباشر وتنقل هموم تحبس حريتها

وبرامج المسخره لها مطلق الحريه في الانتاج..ويقولون ليه اعلامنا فاسد يقولون ليه عيالنا بدو ينحرفون..ياخي شوف المعروض واعرف..الله يعين..

مالكم الا تتابعون ابوظبي جيوغرافي احسن قناه مفيده>>هههههه كاني سويت دعايه لها..

طبعا اقصد تابعو القنوات الوثائقيه  قناة ابوظبي كمثال فقط..واصلا هاليومين التلفزيون اصبح نفس الراديو قليل الي يتابعه..وبما ان القنوات اصبحت عالنت ابحث عن المفيد الي ينفع دنيا واخره..

احس طولت بالكلام لكن هذت جانب اعلام البرامج فقط..تابعونا بالاجزاء الاخرة للفراغ الاعلامي..

تحياتي..

دجاج بالكريمه..

السلام عليكم والرحمه..

لما تعجبني طبخه معينه..واحب اني اطبقها..اخذ اهم مكوناتها والباقي علي بالطبخ

وانا وحظي يا تطلع حلوه او اجيب العيد فيها..

 

طبختنا اليوم من الاكلات المفضله..

وحبيت اسويها..وطبعا ما اتقيد بجمييع المكونات الاغلبيه من راسي

يعني لو تدخلون النت يمكن ما تلاقونها بطريقتي ويمكن بنفس الطريقه الله اعلم.. اعوذ بالله من كلمة لو..لانها تفتح عمل الشيطان..

يعني لو باخذ أي طريقه لازم احط لمستي فيها..خخخخخ ماستر شيف على غفله..

بسم الله نبدا..

نحضر المقادير:

بصل

طماطم

بهارات

ماجي

كريمة خفق

دجاجه

رز

ماء لسلق الرز..زبده

 

الطريقه:

نحمس البصل والطماطم ونضع عليهم البهار والماجي.حتى ينضجون

ثم نضع عليها الدجاجه وتكون مقطعه((على حسب الذي تريدين))

ونقلبها كل  فتره ثم نتركها حتى تنضج..

ثم نسكب عليها الكريمه..

في هذا الاثناء نسلق الرز..

وبعد ان نصفيه عن الماء

نضعه بالجدر ونضع عليه زبده لتعطيه رائحه ونكهه زكيه..

وعليكم بالعافيه..

 

ملاحظه:

1-    لطبخ دجاجه كامله نحتاج الى حبتين ماجي((كرتون واحد))

2-    لتلوين الرز يستخدم ملون طعام او الزعفران المطحون المعروف ((بالعصفر))وهذا خاص بالاكل.

3-    عند وضع العصفر يرجى وضع كمية قليله أي تكون على طرف ملعقة الشاي وخلطه بقليل من الماء

ثم نسكبه على الرز وعند خلطه يتلون الرز..

فتشوني..بطريقتي

السلام عليكم والرحمه

اخباركم واخباركن..

اليوم جبت لكم طريقة الفتشوني بطريقتي..وطبعا المعكرونه بشكل عام ماتقول شيء>>على قولة الوالده..

طبعا ماقيدك بأي نوع خضار..الموجود عندك يصلح مدامه يجي مع المعكرونه..لاتجيبين العيد وتقولين انا قلت..هههههه

وبالفتشوني كل يوم طريقه على حسب الموجود بالثلاجه..ما أقيد نفسي بطريقه معينه..ابدا..

وبقول لكم ليه قلت بطريقتي..

المهم..نبدا

بسم الله

نحضر المقادير:

فلفله

فطر(مشروم)

بصل اخضر

ذره

نقانق>>على الرغبه

معكرونة الفتشوني

كريمة خفق

ماي مغلي..

زيت

بهار

صلصة الصويا..افضل المعتدله او صلصة المحار..

المقادير بالتفصيل..هههههه

----

الطريقه:

نضع زيت و نحمس البصل والفليفه والفطر والذره والنقانق..

نضيف البهار والصويا..ونحمسهم حتى ينضجون..

ثم نصف كرات الفتشوني او المعكرونه فوق الحمسه..

نسكب الماء فوق المعكرونه..ونغلق عليها ونتركها على نار هادئه..

حتى تنضج المعكرونه((راح يقل الماء والمعكرونه مانضجت فنسكب عليها ماي))

ثم نقلبها حتى يختلط المعكرونه بالحمسه..

وعندما تنضج وقبل التقديم نسكب الكريمه المخفوقه عليها..

وبالعافيه عليكم..

 

ملاحظه:

1-    عند طبخ المعكرونه بالطريقه السابقه يرجى ملاحظة كمية الماء..يجب ان تنضج بالكامل..

عندما يقل الماء ولم تنضج يرجى مراعاة زيادة الماء فيها..

2-الخضار اختياريه لا نتقيد بنوع معين..

3-اهم نقطه عندما تكون كمية المعكرونه كبيره ولن تؤكل بوقت واحد يرجى فصل الصلصه عن المعكرونه

لان المعكرونه بشكل عام تشرب ماء..واذا تم وضعها مع الكريمه او أي خلطه اخرى بها مرق ولم تؤكل بوقت واحد راح تعجن عليك..اي تشرب الماي وتلصق

4-اذا تم فصل المعكرونه عن الصلصه يرجى وضع القليل من الزيت على المعكرونه حتى لا تلصق..

--

نسيت اقولكم ليه بطريقتي..

لاني جربت اضع المعكرونه على الحمسه وسلقها

بدل ان اسلقها لحالها..لان هالنوع ينضج بسرعه..

من وجهة نظري..

اللي متابعني بالانستغرام يعرف الصوره تبعها..


لم يتم وضع صور لوجود مشكله بالمدونه..
اضعها بوقت لاحق باذن الله..

فاصولياء بالتونه..

السلام عليكم والرحمه

اليوم جايبه لكم طبخه معروفه عندنا..ومن العنوان عرفتوها

ولكن في ناس مايعرفون يسوونها او مايجي على بالهم يسوونها بالطريقه هذي..

يعني مثلا اعرف كذا عايله حدهم يفتحونها من العلبه ويسخنونا وياكلونها..وعليهم بالعافيه

المهم نبتدي على بركة الله وندخل بصلب الموضوع..حتى ماتطول المقدمه..خخخخخ

 

بسم الله نبدا

اولا نحضر المقادير:

البهار

ماجي او ملح على حسب الكميه

التونه

الفاصولياء

البصل

ليمون اسود

صلصل((معجون طماطم))قليل

 

الطريقه:

نحمس البصل..اذا ذبل اشوي ضعي الليمون الاسود و البهار((احسها افضل كاذا بجميع الطبخات))وانت وذوقك

ثم نضع التونه حتى تنضج ثم نضع عليها الفاصوليا..

طبعا مع البهار ماراح تصير الفاصولياء حمراء..ف..نضع القليل من معجون الطماطم..ونقلبه..ونجعليه على نار هاديه

لمدة10دقائق تقربيا ..بعدا يتم تقديمها مع الخبز..والنواشف..

وعليكم بالعافيه..

ملاحظه:

1-    انا هنا حطيت كنور((لاني احسه اخف ملح من الماجي-ولان الكميه قليله))

2-    افضل وضع الليمون الاسود مع الفاصولياء والمعكرونه الحمراء لانه يضفي لها نكهه خاصه..واو

3-    اصبحت اعتمد طريقة بحمس البصل وهي..

قبل ان اضع البهارات معه اتركه قليلا عالنار حتى يذبل ثم اضع بهاراتي..

 

 

 لم اضع الصور لوجود مشكله بالمدونه..
ساضعهم بوقت لاحق باذن الله..